Muriau Tref Conwy

Hysbysiad Ymwelwyr

Mae'r cyfyngiad dros dro ar hyd muriau tref Conwy o'r Tŵr Gwylio i lawr i Borth yr Adain wedi galluogi ein harbenigwyr cadwraeth – gan weithio ochr yn ochr ag ymgynghorwyr cadwraeth – i asesu'n drylwyr yr angen i wella mynediad i ymwelwyr i'r rhan amlwg hon o’r Safle Treftadaeth y Byd.

Mae Cadw wedi ymrwymo i ehangu mynediad i'w safleoedd hanesyddol ac mae ein gwaith ar furiau tref Conwy yn cynnwys rheiliau mwy cadarn a phaneli rhwyll amddiffynnol i roi profiad mwy diogel i ymwelwyr.

Mae angen cyflwyno cais am Gydsyniad Heneb Gofrestredig cyn y gall unrhyw waith ddechrau ar heneb hanesyddol. Ceir craffu gofalus iawn ar y ceisiadau hyn cyn y rhoddir caniatâd i fwrw ymlaen.

Rydym yn gobeithio y bydd y gwaith yn cael ei wneud ar ddiwedd y flwyddyn hon gyda'r muriau’n ailagor yn llawn ar gyfer Pasg 2026.

Safle Treftadaeth y Byd

Arolwg

Troedio waliau Safle Treftadaeth y Byd

Yn rhan o Safle Treftadaeth y Byd UNESCO sy’n cynnwys cestyll ysblennydd ym Miwmares, Harlech ac yma yng Nghonwy, mae’r muriau trefol hyn ymhlith y ceinaf a’r mwyaf cyflawn yn Ewrop. Ymestynnant yn ddi-dor bron o gwmpas canol canoloesol Conwy, a hynny am dri chwarter milltir, gyda 21 o dyrau a thri phorth gwreiddiol ar eu hyd. Os nad oes ofn uchder arnoch, gallwch fynd am dro ar ben y wal wrth iddi ddolennu o gwmpas strydoedd canoloesol cyfyng Conwy.

Hon yw’r sioe orau am ddim yn y dref, ac mae’n brofiad cyffrous sy’n tanlinellu pur faint y darn godidog hwn o adeiladwaith canoloesol, yn ogystal â chynnig golygfeydd ysblennydd o Gastell Conwy aruchel, y foryd ac Eryri.

Yn ddiweddar (ers mis Ebrill 2025) mae Cadw wedi cymryd ‘Y Croeshoeliad a Ffordd y Groes yn Eglwys Gatholig Sant Mihangel’, sydd wedi’i lleoli oddi ar Rosemary Lane, i Ofal y Wladwriaeth. Mae rhagor o wybodaeth am y paneli ar gael yn adroddiad rhestru Cadw.